Küşt boýunça Türkmenistanyň ýygyndy topary 3 — 11-nji iýun aralygynda Gazagystanyň Aktobe şäherinde geçiriljek «Wladimir Dworkowiçiň Ýadygärligi — Aktobe Open 2026» halkara ýaryşynda çykyş eder. Bu barada Türkmenistanyň Küşt federasiýasynyň metbugat gullygy habar berýär.

Ýaryşyň çäginde iki sany bäsleşik — «Masters» we «Open» ýaryşlary guralar. Çärede 21 ýurtdan küştçülere, şol sanda 23 sany grossmeýstere garaşylýar. Ýaryşyň baýrak gaznasy 100 000 ABŞ dollaryna barbardyr.

Bu ýaryşda çykyş etmek türkmen ýygyndysynyň sentýabr aýynda Samarkantda geçiriljek 46-njy Bütindünýä küşt olimpiadasyna görjek taýýarlygynyň bir bölegi bolar.

Gönüden-göni ýaryşyň öňüsyrasynda, ýagny 18-nji maý — 2-nji iýun aralygynda Türkmenistanyň ýygyndy topary Gazagystanyň Küşt federasiýasynyň çakylygy boýunça Gazagystanyň Kokşetau şäherinde okuw-türgenleşik bäsleşigini geçdi. Bu ýerdäki «Küşt öýüniň» binasynda guralan okuwlar halkara grossmeýster Aleksandr Rahmanowyň ýolbaşçylygynda günde 6-7 sagatlap dowam etdi.

«Bu oňa gatnaşyjylar üçin örän gyzykly boldy. Aleksandr Andreýewiç dogry pikirlenmegi we pozision küşti öwredýär. Tälimçi, esasan, toparlaýyn oýna we oňa psihologik taýdan taýýarlyk görmäge aýratyn üns berýär. Bu bolsa golaýlap gelýän olimpiadanyň öňüsyrasynda örän wajypdyr» diýip, Türkmenistanyň Küşt federasiýasynyň Baş sekretary Mergen Kakabaýew belledi.

Topar Aşgabada gaýdyp gelenden soň hem Gazagystanyň Küşt federasiýasy bilen hyzmatdaşlyk dowam etdiriler. Ýagny, Aleksandr Rahmanow bilen goşmaça onlaýn sapaklary geçirmek meýilleşdirilýär.